ERCk 15 eguneko epea eman dio Masi plebiszitu hauteskundeak deitzeko

ERCk hamabost eguneko epea eman dio Artur Mas Kataluniako Generalitatearen presidenteari plebiszitu hauteskundeak deitzeko, aurrekontuak babestearen truke.

Anna Simo ERCren ordezkariak azaldu duenez, alderdiek ibilbide orriak aurkeztu ostean, "orain beharrezkoa da guztiak uztartzea eta batasuna berreskuratzea". "Aurrekontuak ibilbide orriaren inguruko akordio politikoaren arabera babestuko ditugu, eta 15 eguneko epea dugu hitz egiteko".

Masen urte amaierako hitzaldia "2015ari begira baino gehiago atzera begirakoa" izan zela kritikatu duen arrean, Simok esan du hori ez dela garrantzitsua; "garrantzitsuena herritarrekin dugun konpromisoari erantzuna ematea baita".

Gaineratu duenez, "hauteskundeak atzo iragartzeko eskatu genion, eta 15 eguneko epea dugu egiteko, udaberrian izan daitezen".

Izan ere, ERCren bozeramaileak azpimarratu du urtarrilean deituz gero, udaberrian egingo direla plebiszitu hauteskundeak, baina bestela udal hauteskundeekin eta hauteskunde orokorrekin bat egingo lukeela eta 2016ra atzeratu beharko liratekeela.