ETAko zazpi kideri 20 urte arteko zigorrak ezarri dizkie Frantziak

ETAren logistika taldeko zazpi kide zigortu ditu Frantziak gaur, besteak beste, Mikel Carrera Sarobe Ata. 20 urte arteko espetxe-zigorrak ezarri dizkie 2005ean eta 2006an lapurretak egiteagatik, horietako batzuk pertsonak bahituz.

Horrela, Ata-ri 20 urteko kartzela-zigorra ezarri dio Pariseko Auzitegiak, eta 17 urteko zigorra Zigor Garro Perez Tonino eta Marina Bernado Bonada Doktoka bikoteari.

Kartzelaldia arintzeko neurriak eskatzeko eskubidea izan baino lehen, hirurek zigorren bi herenak espetxean bete beharko dituztela zehaztu du Auzitegiak.

Gutierrez, Mendinueta eta Barandalla

Garai hartan ETA Jose Luis Rodriguez Zapateroren Gobernuarekin hitz egiten ari zen. Gertakari berdinengatik Borja Gutierrez Elordui (12 urte), Iurgi Mendinueta Mintegi (7 urte) eta Oihan Barandalla Goñi (4 urte) zigortu dituzte zortzi magistratuek.

Azkenik, Ibon Gogeaskoetxea Arronategiri bost urteko kartzela-zigorra ezarri diote, baina Zigor Garrorekin partekatzen zuen sumario desberdin batengatik. 2006ko azaroan igorritako sententzia baten aurka helegitea aurkeztu zuten biek. Zazpi urteko espetxe-zigorra ezarri zieten biei.

Zigorrak bete eta gero ETAko zazpi kideak behin betiko Frantziatik kanporatzea erabaki du auzitegiak.