PPk susmoa du EAJk aurrekontu ituna itxita duela PSE-EErekin

PPk bilera eskatu dio EAJri EAEko aurrekontuen inguruan negoziatzen hasteko, baina popularrak beldur dira jeltzaleek dagoeneko PSE-EErekin ituna "itxita" izango ote duten.

Nerea Llanos PPren EAEko idazkari nagusiak Bilbon emandako prentsaurreko batean azaldu duenez, baliteke EAJk eta PSE-EEk, "interes" alderdikoiengatik, dagoeneko itxita edukitzea aurrekontuen "argazkia", "truke politikoagatik", lehentasunak eta zenbatekoak negoziatu gabe.

Llanosek, berriz, adostasun zabalagoa eskatu du aurrekontuak onartzeko. Horren harira, PPk EAJrekin "elkar ulertu" nahi duela adierazi du, eta horregatik eskatu duela bilera.

Hala ere, Bilboko Udalean gertatutakoa ekarri du gogora Llanosek. Bertan, EAJk uko egin zion popularrekin biltzeari, "sozialistekin akordioa itxita zutelako". "Ez dugu jokabide hori ulertzen", gaineratu du.

Aurrekontu proiektuaren edukiari dagokionez, "falazia"tzat jo du Diru-sarrerak Bermatzeko Errentara (DBE) bideratutako dirua % 20 haziko dela esatea, "eskubide subjektiboa" delako, eta "eskatzen duen orori" eman behar zaiolako.

Bestalde, enpresak nazioartekotzeko eta ekintzaileei laguntzeko "benetako" egitasmo bat abian jartzea proposatu du.

Inbertsioei dagokienez, Arabako azpiegitura hidraulikoen egitasmoaren, Donostialdeko metroaren, eta Zorrotzako trenbidea lurperatzearen alde egin du.