Diru-sarrerak bermatzeko errenta arautzea eskatuko du Euskadiko PPk

Euskadiko Alderdi Popularrak Javier Maroto Gasteizko alkate popularrak diru-sarrerak bermatzeko errenta eskuratu ahal izateko baldintzak gogortzeko hasitako sinadura bilketa babestuko duela iragarri du Nerea Llanos Euskadiko popularren idazkari nagusiak. Gaineratu duenez, Alderdi Popularra laguntza horiek handitzeko prest dago, baina ez "aurpegia handia dutenei" eta "aprobetxategiei" estaldura emateko.

Gaur prentsaurrekoa eskaini du Bilbon, eta bertan iragarri du Alderdi Popularrak Javier Maroto Gasteizko alkateak diru-sarrerak bermatzeko errenta eskuratzeko baldintzak gogortzeko hasitako sinadura bilketa babestuko duela, eta sinadura bilketa Euskal Autonomia Erkidego osora zabalduko duela.

PPk babes sozialeko euskal sistemaren aldeko apustua egiten du, Llanosen arabera. Are gehiago, behar izanez gero, horretara bideratutako diru-partida handitzeko prest agertu da: "PP hor egongo litzateke eta lagundu egingo luke".

"Solidaritatea bai eta justizia ere bai", azaldu du. Hori dela eta, Alderdi Popularraren helburua "aurpegi handia duten aprobetxategiek laguntza sozialik ez jasotzea da".

Llanosen esanetan, Euskadiko Alderdi Popularrak Marotoren ekimena babesten du "euskal gizarteak aprobetxategiek sistema beren onura pertsonalerako erabiltzea saihestu nahi duelako".