Aburtok 'pozik' onartu du EAJren Bilboko alkategaia izatea

Juan Mari Aburto Eusko Jaurlaritzako Enplegu eta Gizarte Politiketarako sailburuak "pozik" onartu du hurrengo urteko udal hauteskundeetan EAJren Bilboko alkategaia izatea.

"Eskertu egiten dut konfiantza", esan du, Eusko Legebiltzarreko korridoreetan kazetarien aurrean egindako adierazpenetan.

Nolanahi ere, une honetan bere "konpromiso bakarra" sailburu jarduna dela nabarmendu du.

Halaber, "errespetu osoa" agertu dio EAJren barne prozesuari, eta jeltzaleen Bizkaiko zuzendaritzak bere hautagaitza proposatu badu ere, milintanteek hautagaia "askatasun osoz" hautatuko dutela gaineratu du.

"Prozesua bukatu arte ez dut ezer gehiago esango", esan du sailburuak.

Euzko Alderdi Jeltzaleko Bizkai Buru Batzarrak atzo proposatu zien militanteei Bilboko alkategaia Aburto izatea. Hautagaiak erabakitzeko barne prozesua hilaren 7an abiatuko da.

Ibon Areso (EAJ) Bilboko egungo alkateak uko egin zion hurrengo hauteskundeetara aurkezteari. Areso martxoaren 28tik da alkate, Iñaki Azkuna astebete lehenago hil baitzen.