EAJrekin dituzten itun guztiak berraztertuko dituela esan du Mendiak

Idoia Mendia PSE-EEren idazkari nagusiak iragarri duenez, EAJrekin dituzten itun guztiak berraztertu dituzte eta ez du onartuko izaera nazionalista duen ezer.

PSE-EEk asteburu honetan Bilbon egin duten kongresuaren itxierako hitzaldian, Mendiak ziurtatu egin du soilik herritarren egunerokoan eragiten duten gauzetan egingo dituztela akordioak, esaterako, langabezia, pobrezia, politika sozialak eta lan-eskubideak.

Hitzaldian, idazkari nagusiak terrorismoaren biktimak izan ditu gogoan, eta "hasiera berri" baten aurrean dagoela esan du, baina "betiko" Euskadiko Alderdi Sozialista izaten jarraitu eta ezberdintasunaren kontra egingo dutela zehaztu du.

Mendiaren esanetan, sozialistak "aniztasunaren eta tolerantziaren bermea dira herrialde honetan"; "identitatea ez baita gure politikaren eragilea, baloreek eta printzipioek mugitzen gaituzte, eta horiek elkartasuna, justizia, berdintasuna eta askatasuna izaten jarraitzen dute".

"Ez dugu identitatea lehenesten dutenenen herrialdea nahi, herrialdea elkarbanatu nahi dugu", Mendiaren arabera.

Idazkari nagusi berriak, halaber, ohartarazi duenez, PSE-EEren "agendan" ez dago jasota "nazionalisten lehentasunei" erantzutea, "kontsultak, presoak edo akordioak" ezartzen dituztelako.