Presoen 'borondatea' aitortzeko eskatu die Amaiurrek estatuei

Euskal Preso Politikoen Kolektiboak aurrera egiteko eta bake prozesuan ekarpenak egiteko "agertutako borondatea" aitortzeko eskatu die Xabier Mikel Errekondo Amaiurreko diputatuak Espainiako eta Frantziako estatuei.

"Presoen kolektiboak aurrera egiteko eta bake prozesuan ekarpenak egiteko borondatea agertu du, baina estatuek ez diote borondate hori aitortzen. Espainiako eta Frantziako Gobernuek jarrera itxia dute", salatu du. Hala ere, berandu baino lehen "estatuak errealitateaz jabetu" eta presoei entzungo diotenaren esperantza agertu du.

Cadena Ser irrati kateari eskainitako elkarrizketan Joaquin Gimenez Auzitegi Goreneko epaileak egindako adierazpenak baloratu ditu. Epaileak aste honetan adierazi duenez, "salbuespenezko neurriekin amaitzeko garaia da".

Gimenezen jarrera garrantzitsua dela nabarmendu ostean, "salbuespenezko neurriekin" amaitzeko garaia dela azpimarratu du. "Presoei zigor bikoitza ezartzen zaie, eta dispertsioak egoera kritikoak eragiten ditu", azaldu du.

Halaber, Espainiako Gobernuak "egoera larri horrekin jarraitzen duen bitartean", Amaiurrek sakabanatze politikarekin amaitzeko eskatuko die Jorge Fernandez Diaz Barne ministroari eta Mariano Rajoy Espainiako presidenteari.