Ibarretxe: 'Erabakitzeko eskubidea edo aldebakarreko independentzia'

Juan Jose Ibarretxe lehendakariaren hitzetan, "teoria politikoaren mundua 'voice or exit' Britainia Handiko kontzeptuan oinarritzen da, hau da, hitza ematen didazu edo ospa egingo dut". "Ala erabakitzeko eskubidea gauzatzen da edo aldebakarreko independentzia aldarrikatuko duzu demokratikoki proiektu propioa aurrera eramateko", azaldu du.

Gure Esku Dago plataformak hitzaldia antolatu du gaur, Bilbon. 'Voice or exit' binomioa erabiliz, "demokrazia gutxiagoren aurrean, independentzia gehiagorekin erantzuten" dela adierazi du Ibarretxek.

Erabakitzeko eskubidearen printzipio demokratikoaren "aldeko haize-boladak" ari direla erantsi du lehendakariak. Ibarretxeren esanetan, "oreka soziala lortzearekin eta ekonomiarekin lotura estua du, eta baita garapen jasangarriarekin ere".

"Eskuetan duguna balio ez zaigula uste du gehiengo zabal batek", gaineratu du buruzagi ohiak. "Demokraziari uko egiteak Euskadin eta Katalunian subiranotasunak indar handiagoa hartzea ekarriko du", zehaztu du.

"Demokrazia eskasagoak independentzia gehiago dakar", azaldu du lehendakariak. Ibarretxeren ahotan, herriaren borondateak, demokratikoki adierazia baldin bada, "ez du nazioarteko zuzenbidea urratzen".

Zabaleta

Bestalde, erabakitzeko eskubidean "aurrera egiteko" EAJk, Bilduk eta PSEk iraganean lortutako akordioei "eutsi" behar dietela planteatu du Gemma Zabaleta Eusko Jaurlaritzako sailburu ohiak, eta Loiola jarri du adibidetzat.

Zabaletaren hitzetan, erabakitzeko eskubidea bultzatzeko Euskadiko alderdi "nagusiak", EAJ, EH Bildu eta PSE, ados jarri behar dira "soilik", iraganean egin bezala.

Aoiz

Floren Aoiz Batasunako bozeramaile ohiaren ahotan, erabakitzeko eskubidearen "aldarrikapenak beste edozein eskakizunek baino indar gehiago biltzen du" gaur egun.

Erabakitzeko eskubidea "garai berriko bobedaren gakoa da", Aoizen hitzetan. Euskal "gatazkari zentzuzko eta bidezko irtenbide" emango liokeela gaineratu du.