Kongresuak Segurtasun Pribatuaren Legea onartu du

Kongresuak Segurtasun Pribatuaren Legea onartu du. Horrela, zaindari pribatuek eskumen gehiago eta hainbat funtzio berri izango dituzte, tartean kartzeletako zein etorkinak hartzeko zentroetako kanpoaldean kontrola ezartzea edota "segurtasun publikoari dagokion zerbitzuetan parte hartzea, polizien ekimena osatuz".

Indarrean sartzeko, Estatuko Aldizkari Ofizialean argitaratzea baino ez da falta.

Senatuan hainbat zuzenketa ezarri zituzten, PPren, CiUren eta, neurri batean, EAJren botoekin. Gainerako taldeek baztertu egin dute, "segurtasuna pribatizatzen duelako, Estatuko polizia indarren kaltetan".

Legearen puntuetako batek eztabaida handia sortu du Parlamentuan: zaindari pribatuek delitu bat egin duten hiritarrak atxilotu ahalko dituzte aurrerantzean.

Eusko Legebiltzarrak baztertu du

Eusko Legebiltzarrak egitasmoa "baztertu" du, "horren atzean sektorea pribatizatzeko saiakera dagoelako".

Ganberak testu bat onartu du EAJ, EH Bildu eta PSE-EEren aldeko botoekin; PPk aurka bozkatu du. UPyDk ekimenaren bi puntu onartu ditu eta hirugarren batean abstentzioa eman du.

Eusko Legebiltzarraren arabera, segurtasun politikak botere publikoen esku izaten jarraitu behar du, eta sektorearen izaera publikoa defendatzeko eskatu diote Jaurlaritzari.