Quirogak ez du biltzarra bertan behera utziko, ez dimisioa emango

Nerea Llanos Euskadiko PPren ezohiko kongresua antolatzeko batzordeko presidenteak azaldu duenez, Arantza Quiroga presidenteak ez dauka asteburu honetarako deitutako kongresua bertan behera uzteko inolako asmorik, ezta dimisioa aurkezteko asmorik ere.

Bilbon egindako prentsaurrekoan, Manuel Uriarteren erabakia hizpide izan du Nerea Llanosek. Manuel Uriarte Gasteizko Ogasun zinegotziak uko egin dio EAEko PPko idazkari nagusi izateari. Arantza Quiroga presidenteak, baina, Iñaki Oyarzabalen ordezkoa Manuel Uriarte izatea nahi zuen.

Llanosen esanetan, Arantza Quirogak konpromiso irmoa dauka Euskadiko Alderdi Popularrarekin, eta, hori dela eta, "ez zaio burutik pasatu ere egin kongresua bertan behera uztea, ezta dimisioa ematea ere".

Euskadiko Alderdi Popularrak "zatituta" egotea ukatu du, eta kongresuaren amaieran alderdia batuta egongo dela nabarmendu du. Ildo horretan, "hedabideetan alderdi barruan tentsioak eta desadostasunak daudela zabaldu bada ere, kongresu guztietan gertatu izan da hori, eta gero alderdia batuta atera izan da", gaineratu du.