PSCko hiru diputatu kritikoek ez dute akta utziko

Ostegunean boto diziplina hautsi zuten PSCko Marina Geli, Joan Ignasi Elena eta Nuria Ventura diputatuek jakinarazi dutenez, ez dute diputatu akta utziko nahiz eta alderdiak hala eskatu. PSCk alderdiaren boto diziplina hautsi duten kideei diputatu akta itzultzeko emandako epea igande eguerdian amaitu da.

Marina Geli Kataluniako Osasun sailburu ohi eta PSCko parlamentariak adierazi du ez duela diputatu akta utziko, nahiz eta alderdiak hala eskatu. Gainera, PSCren hausteko arriskuaz ohartarazi du, boto diziplina hautsi zuten Joan Ignasi Elena eta Nuria Ventura diputatuekin batera, alderditik botatzen badute.

Geliren esanetan, ez dauka alderdi berri bat eratzeko "inolako asmorik" eta PSCren barruan jarraitu nahi du. Antonio Balmon PSCko kidea kezkatuta agertu da alderdi berri bat sortzeko arriskua dagoelakoan.

Elenak eta Venturak ere Balmonen adierazpenak hizpide izan dituzte, eta zigorra ezartzea baztertu duelako eta arduraz jokatzeko deia egin duelako pozik agertu dira.

Catalunya Radiori eskainitako elkarrizketa batean esan duenez, ez luke ulertuko alderdiak kanporatzea, eta talde mistora joatea "asko" kostatuko litzaiokeela azaldu du, botoa eman zioten hiritarrei esker baitago dagoen tokian.

Gelik sozialista kataluniarrei adierazi dienez, kaleratzen badituzte, "asko kostatuko da PSCren zati batek batera joateko nahia berreskuratzea". Dena dela, ez duela alderdi berri bat sortzeko asmorik esan du.

Diputatuak alderdiaren zuzendaritzari gogorarazi dio hiru parlamentari kritikoei babesa emateko manifestuak 1.500 hiritar baino gehiagoren sinadurak lortu dituela, eta horiek guztiek uste dutela kaleratzea ez dela konponbidea. "Zer esango diezu pertsona horiei?", galdetu du Gelik, PSCko buru Pere Navarrori zuzenduta.

Sailburu ohiak azpimarratu du kontraesana dela Kongresuak kontsulta baimentzearen aldeko botoa emateagatik zigortzea. Izan ere, Gelik esan duenez, PSCk hauteskunde-programan "erabakitzeko eskubidea" babesten zuen.