Ihes eginda dauden bi gaztek larunbatean agertuko direla iragarri dute

Ihes eginda dauden Goizane Pinedo eta Unai Ruiz Segiko ustezko bi kideek bideo batean iragarri dutenez, larunbatean agertuko dira publikoki, Gasteizen. Bi gazteak ez ziren agertu Segiren kontra Auzitegi Nazionalean egiten ari diren epaiketan, eta ihes eginda daude.

Naiz.info-ri igorritako bideo batean, biek azaldu dute orain hiru hilabete abiatutako desobedientzia ekimena bukatutzat emango dutela larunbatean.

Pinedoren eta Ruizen hitzetan, bete dituzte ekimenarekin bilatzen zituzten helburuak: "bidegabekeria salatzea, herri harresiaren ekimenaren aldeko harri-koskorra jartzea eta, desobedientziaren ildotik, beste batzuek egindako bideari ekarpena egitea". Ildo horretan, Ekaitz Samaniego gasteiztarra gogoratu dute, eta, halaber, ihes eginda dagoen Idoya Iragorri eta Aramaion atxilotutako Irati Mujika agurtu dituzte.