PPCk Aurrekontuen aurka egin eta horien onarpena hilabete atzeratu du

Kataluniako PPk (PPC) Generalitatearen Aurrekontu proiektuaren aurka egin du gaur goizean, Estatutuen Bermeen Kontseiluan. Ondorioz, gutxienez hilabete atzeratu dute Aurrekontuen onarpena.

Hain zuzen ere, Aurrekontuetan galdeketa independentista egiteko 5,75 milioi euro bideratu dituztelako aurkeztu du PPk inpugnazioa.

"Aurrekontu hauek tranpa dira, iruzurra ezkutatzen dute, eta legez kanpokoa den autodeterminazio erreferenduma ordaintzeko diru-publikoa bideratu nahi dute", azaldu du PPCk, astearte honetan egindako agerraldi batean.

Alderdi Popularrak iragarpena egin baino ordu batzuk lehenago, Francesc Homs Generalitateko bozeramaileak Aurrekontuak Estatutuaren eta Konstituzioaren ikuspuntutik "garbiak" direla nabarmendu zuen.

Rajoyk ez du baztertu Masekin biltzea

Bestalde, Mariano Rajoy Espainiako Gobernuko presidenteak ez du baztertu Artur Mas Kataluniako presidentearekin biltzea, baina, edonola ere, ez du galdeketaren ezezkoaren inguruko jarrera aldatzeko asmorik.

Astelehenean bertan, Masek biltzea eskatu zion Rajoyri.