PSEk 2014ko Aurrekontuak 'babestea' espero duela esan du Jaurlaritzak

PSE-EEk 2014. urteko Aurrekontuak "babestea" espero duela adierazi du gaur Josu Erkoreka Eusko Jaurlaritzako bozeramaileak. Izan ere, astelehenean EAJk eta PSE-EEk sinatu zuten 'herri akordioa' Aurrekontuen zirriborrora eramango dute.

Gaurko Gobernu bileraren ostean egindako agerraldian, hurrengo urteko Aurrekontuetan sozialistek eta jeltzaleek adostutako "konpromiso gehienak" jasoko dituztela aurreratu du Erkorekak.

Bestalde, EAJk eta PSE-EEk adostutakoaren, EH Bilduk Gipuzkoan onartutakoaren eta atzo Javier de Andres Arabako ahaldun nagusiak proposatutakoaren arteko ezberdintasunak "teknikoak" baino ez direla esan du bozeramaileak. Horrenbestez, akordioa posible dela uste du.

"Borondate politikoa badago, posible da ezberdintasun tekniko horiek gainditzea eta akordioa lortzea. Borondate politikoa behar da, beraz", nabarmendu du.

Ostegunean politika orokorreko saioa egin arte, "esfortzuak areagotzeko" deia egin du Erkorekak, akordio bila.