Ortuzar: 'EAJren eta PSEren arteko negoziazioak asko aurreratu dira'

Andoni Ortuzarrek esan duenez, fiskalitatearen erreformari buruz EAJren eta PSEren arteko negoziazioak "asko aurreratu dira", eta akordio hori itxiz gero, "aurrekontuen gainean ere adostasun batera iristea izango litzateke logikoena".

Onda Vasca irratian egindako elkarrizketan, fiskalitateari buruzko akordioa uztailean formalizatu dezaketela adierazi du. "Hori da gure helburua", erantsi du.

Idoia Mendiak ere onartu du negoziazioa bide onetik doala, baina hitzarmena hilabete honetan bertan sinatu dezaketela esatea gehiegizkoa dela ohartarazi du.

Mendiaren esanetan, akordioa sinatu aurretik hiru gai definitu behar dituztela azpimarratu du: "zergen azken argazkia zehaztea, iruzurrari aurre egiteko neurriak erabakitzea eta fiskalitate gaietan diputazioen eta legebiltzarraren arteko harremana argitzea".