'Ertzaintzak pertsona guztien segurtasuna bermatu du'

Estefania Beltran de Heredia Segurtasun sailburuak Ertzaintza zoriondu du, Urtza Alkortaren atxiloketa ekiditeko asmoz Ondarroan protestan ari ziren "pertsona guztien segurtasuna bermatzea lortu duelako".

"Ertzaintzak lan gardena egin du eta pertsona guztien segurtasuna zaindu du, baita Ondarroako ordena publikoa eragotzi dutenena ere", erantsi du Radio Euskadin egindako elkarrizketan.

"Ertzaintzari eskerrak eta zorionak eman behar dizkiot; harro nago horrelako Polizia baten buruzagi izateagatik", azpimarratu du.

Segurtasun sailburuak kritikatu du "kasu batzuetan ezker abertzaleak erresistentzia pasibo deitu duena erresistentzia aktibo" bilakatu dela.

Pernando Barrena ezker abertzaleko buruzagiak Ertzaintzaren aurka esandakoak ere izan ditu hizpide; izan ere, Barrenak ondokoa adierazi du Twitterren: "EAJk Ertzaintza bere herriaren kontrako polizia zipaio bihurtu du".

"Zer espero dezakegu egunen batean herri hau gobernatzeko nahia izan baina legea betetzeko asmorik ez dutenez?", galdetu du Beltran de Herediak Barrenaren kritikaren harira.

"Ertzaintza ez dago inolako alderdi politikoren zerbitzura; Ertzaintzak bere eginkizunak ditu, besteak beste, legea betearaztea", azaldu du.

Amaitzeko, gisa honetako protestak antolatzen dituztenei hausnarketa egiteko eskatu die, "Ertzaintzari eta euskal gizarteari ez dagokien erantzukizuna ematen ari direlako".