Hainbat alderdik bat egin dute Herrirak deitutako mobilizazioekin

EH Bildu koalizioa osatzen duten alderdiek (Sortu, EA, Alternatiba eta Aralar), Ezker Batuak,  Gorripideak, Eusko Ekintzak eta Euskal Herriko Komunistek bat egin dute Herrirak hilaren 18rako 200 herritan presoen alde deitutako mobilizazioekin.

Donostian eskainitako prentsaurreko batean, Ainhoa Beolak (Aralar) eta Andrea Uñak (EB) aipatu alderdien "konpromisoa" berretsi dute "giza eskubideekin, konponbidearekin, bakearekin eta espetxe politika aldaketarekin". "Unea da pertsona guztien giza eskubideak, presoenak barne, errespeta ditzaten", aldarrikatu dute.

Horren ildotik, gaixotasun larriak dituzten presoak askatzeko, 197/2006 doktrina desagerrarazteko eta sakabanaketa amaitzeko deia egin dute.

Halaber, "presoen aurkako salbuespen neurrien kontra adostasun zabala" badago ere, Espainiako eta Frantziako gobernuen "jarrera" ez dela aldatu deitoratu dute: "Geldirik egotetik, atzera egitera pasatzen ari dira".

Horren aurrean, euskal gizartea osatzen duten eragileek, alderdiek, erakundeek eta herritarek "zeresan" handia dutela erantsi dute, "elkarlana eginda, ateak irekita eta gatazkaren ondorioak konpontzeko pausoak emanda".

Azkenik, Herrirak hilaren 18rako deitutako #M18Plazara ekimenean parte hartzeko deia zabaldu dute.