Larunbateko manifestazioa ilegala izan daitekeela esan du Urkijok

Herrirak euskal presoei ezartzen dieten kartzela-politika salatzeko eta Xabier Lopez Peña ETAko presoaren heriotza argitzeko larunbaterako deitu duen manifestazioak biktimen legea urra dezakeela ohartarazi dio Carlos Urquijo Espainiako Gobernuak EAEn duen ordezkariak Javier Zaragoza Auzitegi Nazionaleko fiskal buruari.

Espainiako Gobernuaren Ordezkaritzak txostena igorri du Auzitegi Nazionalera, Herrirak euskal presoen kontrako kartzela-politika salatzeko eta Thierryren heriotza argi dadila aldarrikatzeko larunbaterako deitu duen manifestazioaren berri emateko.

Espainiako Gobernuaren ordezkariaren esanetan, "Thierryren omenezko martxak" Terrorismoaren Biktimen Babeserako eta Errekonozimendurako Legea urra dezake.

Era berean, Zigor Kodearen 578. Artikulua, terrorismoa goratzearen edo justifikatzearen delitua, ere urra dezakeela ohartarazi du.