Nafarroako Gobernuak 'barkamena' eskatu die herritarrei dietengatik

Nafarroako Gobernuak "bat egiten du herritarren haserrearekin, akatsak onartzen ditu eta barkamena eskatzen du" Nafarroako Kutxan politikariek jaso dituzten dietengatik. Horren harira, dieten sistema dagoeneko deuseztatu dutela gogorarazi du.

Juan Luis Sanchez de Muniain Nafarroako Gobernuaren kontseilari bozeramaileak prentsaurreko batean azaldu duenez, Gobernuak "badaki" iritzi publikoak kritikatu egin dutela UPNko kideek, Yolanda Barcina presidenteak eta Miguel Sanz presidente ohiak besteak beste, jaso dituzten dietengatik.

Sanchez de Munianek gogora ekarri duenez, Barcinak "onartu egin zuen akatsa eta barkamena eskatu zuen; gainera, gaur egun, Gobernuko inork ez" du dietarik jasotzen CANen kontura eta batzuek itzuli egin dute jasotako dirua, eta horrek agerian uzten du "Gobernuak atzera egin duela".

"Gaur egun ez dago Erakunde Sortzaileen Batzorderik, Gobernuak kendu egin zuen; ez da dietarik kobratzen, eta Nafarroako Kutxaren Fundazioan ez dago ordezkari politikorik", gaineratu du.