Trump gero eta larriago

Trumpen impeachmentari buruzko adierazpen irekiak gauza bat argi ari dira uzten. Urtebete barru, Trumpen alde botoa eman nahiko dutenek eskubide osoa izango dute, nola ez bada! Eta beraien botoa hautagai demokrataren alde emango dutenena bezain zilegia izango da, oraindik nor izango den ez badakigu ere.

Hori bai, Trumpen alde botoa emango dutenek jakingo dute gezurti eta manipulatzaile bati ematen ari zaizkiola botoa. Oraindik ezin dugu kriminala denik esan, ikerketa batzordean entzuten ari garenak ez baitu frogatu Trumpek delitu egin zuenik.

Orain arte entzundako lekukotasun guztien arabera Trumpek, bere abokatu Giulianiren bitartez Ukrainako gobernua estutu zuen, Joe Biden politiko demokrataren semearen, Hunter Bidenen enpresa baten aurka ikerketa ireki zezan ustelkeriagatik.

Helburua argia da: semearen izena zikinduz aitarena ere zikintzea. Atzo Gordon Sondlandek, Estatu Batuek Europar Batasunean duten enbaxadoreak esan zuenak ez du zalantza izpirik utzi; Trumpek antolatu zuen konspirazioa, eta hori, Estatu Batuetako sistema politikoan, delitu izatetik oso oso gertu dago.