Ozta-ozta, baina Netanyahu

Ziurrenik Benjamin Netanyahuk jarraituko du Israelgo lehen ministro izaten. Atzoko hauteskundeen emaitzak ez dira behin betikoak oraindik, baina argi dago Netanyahu babesten zuten alderdi eskuindarrek parlamentuan gehiengoari eutsiko diotela. Orain arte jakin diren emaitzekin, berdinduta daude Benjamin Netanyahuren Likud eskuindarra, eta Benny Gantz jeneral ohiaren Urdin eta Zuri zentroko alderdia. Gerta liteke azken kontaketan Urdin eta Zuria alderdiak Likudek baino boto gehiago izatea.

Hori bai, Gantzek aukera gutxi du gobernua osatzeko. Zentroko eta ezkerreko alderdi guztiak gehituta ere ez dira Israelgo Parlamentuan gehiengo osoa ematen duen 61 eserlekuetara iristen. Netanyahuk, aldiz, erraz gaindituko du langa hori alderdi erlijioso eta ultraeskuindarrekin bat eginda. Beraz, nahikoa du orain arteko koalizioari eustea gobernatzen jarraitzeko. Reuven Rivlin Israelgo presidenteak gobernua osatzeko aukera zeini eman erabakitzeko alderdiekin erronda egiten duenean, eserleku gehiago egongo dira Netanyahuren alde, Gantzen alde baino.