Egoera zaila Guaidorentzat

Juan Guaido, Venezuelako presidente arduradun izendatua, egoera zailean dago.

Maduro botatzeko bere planaren oinarria zen militarren zati baten babesa izango zuen herri altxamendua lortzea. Nazioarteko aitortza ere bilatzen zuen. Azken hori lortu du, baina planaren gainontzeko zatiak huts egin du. Jende asko atera da kalera Maduroren aurka, bai, baina militarrak Maduroren alboan mantendu dira, banakako salbuespen batzuk kenduta.

Egoera horren aurrean, Guaidok tentazio arriskutsua izan dezake: Estatu Batuei esku hartze militarra eskatzea, edo gutxienik, Venezuelaren aurkako isun ekonomikoak gogortzea eskatzea.

Esku hartze militarra Guaidorentzat suizidioa litzateke: Nazioarteko bere babesen zati bat galduko luke eta Venezuelan bere aldeko diren hainbatek ez lukete ondo ikusiko. Isunen gogortzeak epe ertainean izan ditzake eraginak. Medikamentuen eta elikagaien hornidurak okerrera egingo luke eta horrek jende ugari bultza dezake Maduroren kontrako herri altxamendura; baina aurkako ondorioa ere izan dezake. Gobernua bere baitan gehiago itxiko litzateke, errepresioak gora egingo luke, eta behin betiko diktadura bat ezarriko litzateke, nazioarteko hiru edo lau aliaturen babesarekin biziraun dezakeena. Alegia, duela 60 urte Kuban gertatu zena.