Hitzordua Helsinkin

Beste batzuetan ere Moskuko eta Washintongo agintarien arteko goi bileren lekuko izan da Helsinki. 1975en, Gerald Ford eta Leonid Breznev elkartu ziren bertan. 1990ean, George Bush aita eta Mijail Gorbachov batu ziren, eta 1997an, berriz, Bill Clinton eta Boris Yesltsin, izan ziren protagonista. Oraingo honetan, Trumpek eta Putinek egingo dute alde biko lehenengo bilera Finlandiako hirian.

Ikusi izan ditugu beste bilera batzuetan, baina hau dute lehenengo aurrez aurrekoa. Eta zertarako elkartuko dira? Uste guztien arabera, Errusiaren eta Ameriketako Estatu Batuen (AEB) arteko harremanak estutzeko, baita pil-pilean diren nazioarteko gatazkei buruz hitz egin eta jarrerak hurbiltzeko ere. Ez dago ezer itxaroterik Ukrainiari dagokionez. Putinek ez du atzera egingo, Krimeako anexioan eta Trumpek ezin du anexio hori onartu. Siriari dagokionez, egon daitezke komuneko hainbat puntu. AEBi interesatzen zaie Iranek Sirian duen parte hartzea gutxitzea. Eta Putinek konbentzitu dezake Trump Baxar-al-Assadi gerra irabazten uzteko. Era horretan, Moskuk Assaden inguruan duen eraginari eutsiko lioke.