Zentsura-mozio batek Michel Barnier kargutik kendu du, agintera heldu eta hiru hilabetera

Zentsura-mozio batek Michel Barnier Frantziako lehen ministroa kargutik kendu du gaur, agintera heldu eta hiru hilabete eskasera, Emmanuel Macron presidenteak irailaren 5ean izendatu baitzuen. Horrela, Barnier da Bigarren Mundu Gerratik karguan denbora gutxien iraungo duen lehen ministroa.

Fronte Popular Berriak 182 diputatu ditu Ganberan, eta Marine Le Penen RNko 143 eserlekuei gehituta, Macronek Gobernuan jarri zuen politikari beteranoa kargutik kentzeko balio izan dute.

Barnierrek gutxiengoan gobernatzen zuen orain arte, eta, aurrekontuak onartzeko zailtasuna ikusita, astelehenean Frantziako Konstituzioaren 49.3 artikulura jo zuen. Artikulu horrek legeak onartzeko aukera jasotzen du, bozketa parlamentariorik gabe, zentsura-mozio bati men egitearen truke.

Fronte Popular Berriak eta RNk Michel Barnier lehen ministroaren aurkako aldarria egin dute gaur Asanblea Nazionalean, Marine Le Pen buruzagi ultraeskuindarrak "Gobernu iragankor" gisa deskribatutako Gobernuari amaiera eman dion zentsura-mozioari buruzko eztabaidaren hasieran.

Lehen ministro izendatu eta hiru hilabetera, Barnierren agintaldia bukaerara hurbiltzen ari da aurrekontuen gainean adostasunik ez dagoelako. "Gaur historia egiten ari gara", esan du Eric Coquerel diputatuak, Frantzia Intsumisoko kideak, tentsio handiko osoko bilkuran.

Coquerelek berretsi duenez, egungo Gobernuak "irain" egin die azken hauteskundeetan Asanblea Nazionalean eserleku gehien dituen blokea ezkerrean kokatu zuten boto-emaileei, nahiz eta alderdi eta familia politiko bakar batek ere ez duen gehiengo nahikorik Ganberan.

Eric Coquerel Frantzia Intsumisoko diputatua, txalo artean, bere eserlekura itzultzen. Argazkia: EFE

Bestalde, Le Penek bere "sektarismoa" eta "dogmatismoa" aurpegiratu dizkio Barnierri, Gobernuak eta Emmanuel Macron presidenteak klase ertaina eta langileria zigortzen dituzten kontu publikoak prestatu dituztelako, besteak beste, zerga igoerekin.

Michel Barnier lehen ministroak kargugabetzea bozkatu baino lehen ziurtatu duenez, Frantziak "errealitate ekonomiko zaila bizi du, eta hori ez da desagertuko zentsura-mozio batekin".

Agurreko tonu nabarmenarekin, bozketa hasteko minutu batzuk falta ziren arren, Barnierrek "erantzukizunez" jokatzeko deia egin du berriro, eta Gobernua eroriz gero herrialdeak bizi dituen arriskuez ohartarazi du.

Marine Le Pen ultraeskuindarra, Asanblea Nazionalean emandako hitzaldian. Argazkia: EFE

Barnier Gobernuko buruzagitzara iritsi zen bi hilabeteko etenaldi politiko baten eta hilabete Eliseoan negoziatzen eman ostean, harik eta presidenteak brexitaren negoziatzaile ohi beteranoa aukeratu zuen arte, joan den uztaileko hauteskundeetatik sortutako Ganberan esertzen diren hiru familia politiko nagusiak adiskidetzeko modu bakar gisa.

Ezkerrak Barnier hasiera-hasieratik errefusatu zuen. Nahiz eta ezkerrak beste bi blokeek baino diputatu gehiago izan, Barnierrek Le Penen babesa izan du, astelehenean galdu zuen arte.

Lecornu, Bayrou eta Retailleau, ordezkatzeko hautagaien artean

Macronek beste bilera sorta bat abiatu beharko du orain alderdiekin, krisiari irtenbidea bilatzeko. Ezkerra, Fronte Popular Berria, eserleku gehien dituen taldea da, baina hauteskundeen ostean, presidenteak baztertu egin zuen bloke horretako lehen ministro bat proposatzea, beste familia politiko batzuen babesik jasoko ez zuela argudiatuz.

Gainera, Macronek ezin ditu hauteskundeak aurreratu, Konstituzioak ezartzen baitu ezin dela Asanblada Nazionala desegin aurreko hitzordutik gutxienez urtebete igaro arte (epea 2025eko uztailean beteko litzateke, beraz).

Barnier ordezkatzeko izenen artean, Sebastian Lecornu egungo Defentsa ministroa da hautagai sendoena, bera baita Macronek 2017an Eliseoa eskuratu zuenetik Gobernuan irauten duen bakarra.

Gainera, Lecornuk abantaila bat du: Le Penen begikoa da, eta horrek balio dezake Barnierrek lortzen jakin ez duen itunak adosteko.

François Bayrou zentrista beteranoa kargurako beste hautagaietako bat da. Hainbat aldiz ministro eta Eliseorako hautagai izan da.

Le Penekin batera, Europako Parlamentuko funtsekin legez kanpoko finantzaketaren kasu batean inputatu egon zen, baina froga faltagatik absolbitu zuten. Le Pen bezala, Bayrou hauteskunde-sistema aldatzearen aldekoa da.

Beste aukera bat egungo Barne ministro Bruno Retailleauren alde egitea da, eskuin tradizionaleko hegalik gogor eta kontserbadoreenaren ordezkaria, eta immigrazio eta segurtasun gaietan Le Penekin bat dator.