Euroganberak onespena eman dio Von der Leyen presidente eta Ribera presidenteorde izango dituen Batzordeari

Europako Parlamentuak behin betiko onespena eman dio Ursula Von der Leyen presidentea buru izango duen Europako Batzorde berriari. Gobernu taldeak aldeko 370 boto jaso ditu, eta kontrako 282. Halaber, 36 europarlamentari abstenitu egin dira.

Ursula Von der Leyenen gobernuak Europako Parlamentuaren % 51ren babesa lortu du, inoiz Europar Batasuneko gobernu talde batek lorturiko emaitzarik txarrena. Bigarrenez jarraian Europako Batzordeko presidente izango denak babes handiagoa eskuratu zuen uztaileko bozketan, baiezko 401 boto jaso baitzituen.

Gaurko bozketan agerian gelditu da Europako Parlamentuaren zatiketa. Gehiengo sinplea nahikoa zen Von der Leyenen gobernu talde berria onartzeko, eta hori Europako popularren, sozialdemokraten eta liberalen arteko akordioak bermatu du. Halaber, Berdeen taldeko eta eskuin muturreko ECR taldeko kide batzuek ere alde bozkatu dute. Aitzitik, kontrako botoa eman dute Espainiako popularrek. 

Gauzak horrela, eta azken tramitea gaindituta, Europar Batasuneko gobernu talde berriak datorren igandean (abenduak 1) hasiko du bost urteko legegintzaldia.

EAJk Europako Batzorde berria babestu du, eta EH Bilduk ezezko botoa eman du, Podemos, Sumar, Compromis, Comuns, BNG eta ERC bezala. Era berean, Espainiako ultraeskuinak, Voxek eta Alvise Perezen Se Acabo la Fiesta alderdiak, ez dituzte komisario berriak babestu.

¿¿ @pernandobarrena|k iragarri du EH Bilduk ezezko botoa emango diola Europako Batzorde berriari.

Besteak beste, Europar Batasunean edozein konkista sozial arriskuan jarriko duen eskuin muturrera egindako bira ultrakontserbadorea gaitzetsi du eurodiputatuak. pic.twitter.com/kHXdRGP7bQ

— EH Bildu (@ehbildu) November 27, 2024