Mundua
AEB-ko hauteskundeak
Kamala Harrisek porrota aitortu du: "Ez dira nahi genituen emaitzak, baina onartu egin behar ditugu"
Agentziak | EITB Media
Hautagai demokrata eta AEBko presidenteordeak Trump telefonoz zoriondu duela iragarri du, eta "botere aldaketa baketsu" baten alde lan egingo duela hitzeman.
Albisteak (3)
Kamala Harris hautagai demokrata eta AEBko presidenteordeak hauteskundeetan jasotako porrota aitortu du bozen biharamunean. "Ez dira nahi genituen emaitzak, baina onartu egin behar ditugu, bozak galtzen direnean printzipio demokratikoa delako hori aitortzea", nabarmendu du.
Emaitza kaskarrak ezagutu ahala husten joan zen Howard Unibertsitatera itzuli da Harris biharamunean, eta han eman du hitzaldia. Emaitzak gorabehera, Harrisek promestu du "AEBren argia" bueltatu egingo dela "eta, bitartean, lanean eta borrokan jarraituko dugu".
Harrisen hitzetan, "gaur Trump presidente hautetsiarekin hitz egin dut, eta zorionak eman dizkiot garaipenagatik. Jakinarazi diot trantsizioan lagunduko diogula berari eta bere lantaldeari, eta botere aldaketa baketsua izan dadin lan egingo dugula".
Hala ere, azpimarratu du "askatasunaren, aukeren, justiziaren eta pertsona guztien duintasunaren aldeko borrokari" eutsiko diola. Izan ere, horiek dira, Harrisen aburuz, "nazioaren oinarrizko ideiak, AEBren alderik onena erakusten duten idealak".
