Komunikazio dispositibo gehiago lehertu dira Libanon, eta gutxienez 20 hildako eta 450 zauritu izan dira

Libanoko hainbat eskualdetan, Beirut hiriburuan barne, komunikazio dispositiboen leherketa gehiago izan dira gaur, bezperan gertatu zen bezala. Gutxienez, 12 pertsona hil eta 2.800 inguru zauritu zituzten eztandek atzo. Libanoko osasun agintariek adierazi dutenez, gaur gutxienez 20 pertsona gehiago hil eta 450 zauritu dira.

Badirudi leherketak bezperan baino indartsuagoak izan direla, eta suteak eragin ditzutela etxebizitzetan eta ibilgailuetan.

Zenbaketaren arabera, hegoaldeko Nabatieh probintzian bakarrik kiskali dira 60 etxebizitza eta establezimendu, baita 15 auto eta dozenaka motor ere, "hari gabeko aparatuen eta hatz-marken irakurgailuen" leherketen ondorioz.

Era berean, Bekaan (ekialdea), Baalbek-Hermelen (ekialdea) eta Libano hegoaldean ere suteak izan dira, baita Beiruteko hegoaldeko auzoetan ere, guztiak ere Hezbollah talde xiitaren gotorlekuak.

Sare sozialetan zabaldutako irudien arabera, walkie-talkieak izan dira eztanda egin duten gailuak.

Libanoko eta Hezbollahko agintariek salatu dute asteartean izandako leherketak Israelek eragin zituela, eta erantzun bat emango dutela, nahiz eta Israelgo Gobernuak oraindik ez duen horri buruzko adierazpenik egin, aurretik Sirian, Iranen eta Libanon bertan egindako erasoetan bezala.

Gainera, Hezbollahk Israelgo iparraldearen aurka koheteak jaurti ditu gaur, Estatu sionistak bezperan milaka bilaketa dispositibo zartarazi zituenetik egin duen lehen ekintza.

"Erresistentzia Islamikoko gudariek Israelgo etsaiaren artilleriako bunkerrak bonbardatu dituzte Neve Ziven, kohete andana batekin", iragarri du Hezbollahk, ohar baten bidez. Israelen aurkako azken ekintza astearte arratsaldeko lehen orduan egin zuen.

Talde xiitak Estatu sionistaren aurkako "berariazko erantzuna" agindu du, baina oraindik ez du ezer egin.

Israelgo agintariek aurreko egunetan Libanoren aurkako erretorika gogortu eta mugimendu xiitaren kontrako gerra ireki baten balizko hasiera mahai gainean jarri ondoren jazo ziren dispositibo elektronikoen eztandak.

Aldeak iragan urritik gatazkan murgilduta daude, 2006ko gerraz geroztik gertatutako borrokaldi larrienetan.