Israelek Gaza, Zisjordania eta Libano erasotzen jarraitzen du, Iranen erantzunaren zain

Israelek Beirut kanpoaldean Hezbollahko komandante gorena, Fuad Shukr, eta beste sei pertsona hil zituen bonbardaketa gertatu zenetik astebete bete da, eta egun bat geroago Estatu sionistak Ismail Haniyeh Hamas mugimendu islamista palestinarreko buruzagi politikoa hil zuen, Teheranen, eta Iranek mendekua agindu zuen. Ondorioz, Ekialde Hurbila alerta gorenean dago, eraso horien erantzunaren zain.

Bitartean, indarkeriak eskualde osoan jarraitzen du. Horrela, gutxienez bost pertsona hil dira gaur, horietako lau Hezbollah alderdi xiitako kideak, Israelek Libano hegoaldeko Maifadoun herriko eraikin baten aurka egindako eraso batean.

Gainera, Israelek gutxienez 30 pertsona hil eta beste 66 zauritu ditu azken 24 orduetan Gazako Zerrendan, bertako Osasun Ministerioaren datuen arabera.

Urriaren 7tik 39.653 pertsona hil eta 91.500 baino gehiago zauritu dituzte Zerrenda suntsituan, Israelen bonbardaketa etengabeetan. Osasun agintarien arabera, 10.000 gorpu hondakinen azpian lurperatuta daude oraindik.

Bestalde, Israelgo Armadak Kerem Shalomeko bidegurutzetik, Gazako hego-ekialdetik, sartzen den laguntza humanitarioa gelditu duela iragarri du gaur, bide horretatik gertu zeuden soldaduen aurka tankeen aurkako misilekin egindako erasoa argudiatuz.

Israelek entregatutako gorpuetako batzuk, Khan Yunisen (Gaza). Argazkia: EFE

84 gorpu

Astelehenean, Israelek 84 palestinarren gorpuak entregatu zituen, Armadak Zerrendako hilerrietatik ateratakoak. Horietako batzuk deskonposizio egoeran ala zatituta zeuden edo identifika ezinak ziren.

Gorpuak olana urdinetan bilduta iritsi ziren kamioi baten atzealdean, eta Khan Yuniseko hilerrian lurperatu dituzte, Gazako Zerrendaren hegoaldean, Palestinako Osasun Ministerioak jakitera eman duenez.

Hamasek salatu du gorputzak "erabat deskonposatuta" daudela, eta, ondorioz, ezinezkoa dela identifikatzea. "Gizateriaren historian aurrekaririk ez duen krimen sadikoa da", salatu du talde palestinarrak.

Tulkarem (Zisjordania). Argazkia: EFE

12 hildako Zisjordania okupatuan

Zisjordania okupatuan, gutxienez 12 palestinar hil dituzte Israelgo indarrek azken 24 orduetan, iturri ofizialek jakitera eman dutenez, Bigarren Intifadatik aurrekaririk ez duen indarkeria olde batean murgilduta.

Operazioetan, Israelgo inteligentzia indarrek droneak eta lehergailuak erabili dituzte Yeninen.

Joan den larunbatean, Israelek bi dronerekin bonbardatu zuen Zisjordaniako Tulkarem hiria, eta guztira bederatzi miliziano hil zituen.

Zisjordania okupatuak Bigarren Intifadatik (2000-05) indarkeria garai larriena bizi du, eta 2024tik hona gutxienez 276 palestinar hil ditu Israelek, gehienak milizianoak edo erasotzaileak, baina baita zibilak ere, tartean 51 adingabe. 2023a azken bi hamarkadetako urterik odoltsuena izan zen, 520 hildako baino gehiagorekin.

Israelen aldetik 20 pertsona hil dituzte aurten: 11 soldadu eta bederatzi zibil, horietako bost kolonoak.