Von der Leyenek Meloniren ultraeskuinari babes-hesia kendu dio, gaur karguan errepikatu ahal izateko

Ursula von der Leyen Europako Batzordeko presidenteak karguan errepikatzea izango du jokoan gaur Euroganberan. Horretarako, eskuin muturrari ezarritako babes-hesiaren zati bat kendu du, Giorgia Meloni Italiako lehen ministroaren Kontserbadore eta Erreformistekin (ECR) salbuespena eginda.

Von der Leyen gehiengo ahul batekin iritsiko da osoko bilkurara, baina azken orduko aldaketen arabera, baliteke Berdeen eta ECRren babesa lortzea, azken horiek eskuin muturreko beste talde batzuengandik bereizten baititu, hala nola Viktor Orban Hungariako lehen ministroaren taldetik edo Alemaniarako Alternatiba alderdi ultraren familia politikotik.

Testuinguru horretan, 2019an bere hautagaitza babestu zuten Europako Alderdi Popularrak, sozialistek eta liberalek osatutako koalizioa errepikatzea bilatuko du Von der Leyenek. Guztira, 401 eserleku dituzte hiru talde horiek, hemizikloa osatzen duten 720 ordezkarietatik.

Hala ere, Von der Leyenek 361 babes lortu behar ditu langa gainditzeko, eta horrek zentroko koalizioaren gehiengo ahuletik kanpo babesa bilatzera eta ECRk eskaintzen dizkion aukerak aztertzera behartu dute, Estatuko ordezkaritzen artean azken orduko boto norabide aldaketak eta ezustekoak saihesteko. Bozketa europarlamentarien boto sekretu bidez egingo da.

Von der Leyenen familia politikoak, Europako Alderdi Popularrak (188 eserleku), arrakalarik gabeko babesa bermatu dio Europako Gobernuko buruari. Sozialdemokratek eta liberalek, ostera, euren lehentasunen errespetua jarri dute, eta, aldi berean, eskuin muturrarekin edozein lankidetza errefusatu dute. Ultraeskuinak, bestalde, hiru talde parlamentario osatzea eta 187 ordezkari erdietsi ditu legealdi honetan.

Sozialdemokratek (136) eta liberalek (77) argi utzi diote Von der Leyeni ez dutela botorik izango eskuin muturreko taldeekin ituna eginez gero, baina politikari alemaniarra hiru taldeen artean bereizten saiatu da, eta eskua luzatu dio Meloniren alderdiari, Europaren aldekoak, Vladimir Putinen erregimenaren aurkakoak eta Zuzenbide Estatuaren defendatzaileak direla defendatuz.

EBko Auzitegi Nagusiaren epaia

Atzo, asteazkena, Europar Batasuneko Auzitegi Nagusiak Europako Batzordearen aurkako epaia eman zuen, pandemiaren hasieran koronabirusaren aurkako txertoak erosteko Ursula von der Leyeneko Gobernuak farmazia konpainia handiekin sinatu zituen kontratuen baldintzen inguruko gardentasun faltagatik.

Europako Justiziak lehen auzialdian emandako ebazpenaren arabera, Bruselak ez zien utzi eurodiputatuei eta hori eskatu zuten beste pertsona batzuei kontratuen kalte-ordainen inguruko xedapenei eta negoziatzaileen interes gatazkei buruzko informazioa eskuratzen. Epaiaren ondotik, Europako Batzordeak argudiatu du horrelako akordioak, kontratuak, lortzen "zailak" direla.

4:13

Euskal eurodiputatuek legealdi berriaren helburuetako batzuk zehaztu dituzte