Hungariak hartu du EBko Kontseiluaren Presidentetza, gainerako estatu kideak deseroso sentiaraziz

Hungariak hartu du astelehen honetan, uztailak 1, Europar Batasuneko Kontseiluaren txandakako Presidentetza. Gauzak horrela, Viktor Orbanen Gobernu kontserbadoreak "bitartekari zintzoa" izan beharko du estatu kideen artean seihileko honetan. Belgikak izan du orain arte ardura hori.

Hungariako Gobernu ultrakontserbadoreak bere gain hartu du Europako agenda, "zintzo" jokatzeko konpromisoarekin eta gainerako estatu kideekin zein erakundeekin "lankidetza zintzoa" izateko borondatearekin. Halaber, Europan bakea, segurtasuna eta oparotasuna bermatzeko ardura izango du, Europar Batasunak agintzen duenez.

Hungariak EBko Kontseiluaren Presidentetza eskuratzeko egindako eskaera-orrian Europaren hedapen, defentsa eta lehiakortasun gaiak aipatzen dira. Budapestek seihileko honentzat aukeratu duen leloak honako hau dio: "Europa berriro handi egitea da erronka".

Ziurgabetasuna nagusi den egoera honetan, adibidez Ukrainako gerra edo eskuin muturraren gorakada dela eta, EBko Kontseiluaren Presidentetza Donald Trump AEBko presidente ohi eta hautagaiarekin guztiz bat datorren buruzagi ultrakontserbadorearen esku geratzeak ezinegona eta deserosotasuna eragin du Bruselan.

Ez da ahaztu behar, gainera, duela zenbait urtetik Hungaria EBko Itunaren 7. artikuluaren prozeduraren pean dagoela, bere erreforma antidemokratikoengatik eta bloke osoan zuzenbide-estatuarentzat planteatzen duten arriskuagatik. Mekanismo horrek, Budapesten aurka egin arren, boto-eskubidea bertan behera utz dezake 27ri erabakiak hartzeko orduan.

Europako Parlamentuak ebazpen batean ohartarazi zuen Orbanek txandakako Presidentetza hartzea arriskutsua zela, eta hura geldiarazteko neurriak hartzea eskatu zuen, baina ez du ezertarako balio izan horrek.