Iranek ziurtatu du Israelen aurkako erasoaren helburua ez dela izan Ekialde Hurbilean tentsioa areagotzea

Iranek ziurtatu du Israelen kontra asteburuan egindako erasoaren helburua ez dela izan Ekialde Hurbilean tentsioa areagotzea. Eraso hori "beharrezkoa, neurrizkoa eta helburu militarren kontrakoa" izan zela erantsi du. "Iranek ez du bilatzen eskualdean tentsioa areagotzea", esan du Nase Kanani Irango Gobernuko Atzerri Ministerioko eledunak, Teheranen egin duen agerraldi batean.

Esan duenez, Iranek "inoiz baino indartsuago erantzungo die aurkariaren legez kanpoko ekintzei". Argi esan du, baita ere, bakea eta segurtasuna oinarri dituen Nazio Batuen Gutunarekin bat egiten duela herrialdeak. Beste behin, gogor gaitzetsi du Israelek apirilaren 1ean Damaskon egindako erasoa; zortzi pertsona hil ziren enbaxada irandarraren aurkako bonbardaketan. Horren harira, Kananik adierazi du falta botatzen duela nazioartearen babesa, tartean, NBErena edota AEB, Erresuma Batua eta Frantzia herrialdeena.

Bestalde, Israelen kontrako erasoagatik Iranek jaso ditzakeen ondorioei dagokienez, bozeramaileak eskatu du "Iranen moderazioa aintzat hartzeko". "Gure herrialdeak azken hilabeteotan bakearen eta segurtasunaren alde erakutsi duen jarrera hartu beharko lukete kontuan", gehitu du.

Gutxienez, bederatzi herrialderekin abiatu ditu Iranek elkarrizketa diplomatikoak, asteburuko erasoen ondotik. Israelen erasoen aurrean, geldirik ez direla egongo eta erantzun egingo dutela azaldu du.

Bere aldetik, Israelgo Gobernuak ez du bere jarrera ezkutatu: erantzuteko prest agertu da, "ekintzekin, eta ez hitzekin". Lehenaz gain, egoera oso larria da, beraz, Ekialde Hurbilean, eta gerrak beste koska bat gora egin dezakeela uste dute aditu askok. Hau da, Israel Gazan egiten ari den inbasioa inguruko herrialdeetara zabaltzeko arriskuaz ohartarazi dute.

Goizetik, bilduta dago Israelgo Gerra Kabinetea eta bertan erabakiko dute Irani emango dioten erantzuna. Ondorengo orduotan jakitea espero da.