NBEko Segurtasun Kontseiluak Gazarako laguntza bultzatzen saiatzeko ebazpena onartu du

NBEko Segurtasun Kontseiluak Gazako Zerrendara laguntza humanitarioa bidaltzea bultzatzeko ebazpen bat onartu du gaur, astebeteko negoziazio gogorren ostean.

Ekimena Arabiar Emirerri Batuek aurkeztu dute, eta hainbat aldiz berridatzi behar izan dute Ameriketako Estatu Batuen eragozpenengatik, beto ahalmena baitu organismoan. Washington azkenean abstenitu egin da, Errusia bezala.

Testuak NBEko idazkari nagusiari eskatzen dio koordinatzaile berezi bat izenda dezala laguntza humanitarioa lurralde palestinarrera bidaltzen dela egiaztatzeko.

Gosete arriskua eta 893.000 haur desplazatu

Hain zuzen ere, Europar Batasunak Gazan gosetea izateko arriskuaz ohartarazi du ostiral honetan. Agiri bateratu batean, Josep Borrell EBko Kanpo Politikarako goi-ordezkaria eta Janez Lenarcic Krisiak Kudeatzeko komisarioa "atsekabetuta" agertu dira; izan ere, Elikagaien Segurtasunaren Sailkapen Integratuaren (IFK) ebaluazioaren arabera, Gazako biztanleen % 100ek "elikadura-segurtasun falta larria" du eta biztanleriaren laurdenak "goseari" aurre egin behar dio.

Gainera, 893.000 haur inguru behartutako desplazatu bihurtu dira Israelen erasoaldia gogortu zenetik, Save the Children gobernuz kanpoko erakundeak egindako kalkuluen arabera, Nazio Batuek eta Palestinar Aginte Nazionalaren Estatistika Bulego Nagusiak emandako datuetan oinarrituta.

Riyad Mansour Palestinako enbaxadorea, NBEko Segurtasu Kontseiluak ebazpena bozkatu baino lehen. Argazkia: EFE

Israelen erasoak ez dira eten

NBEren azken erabakia gaur gauean Israelgo Armadak Zerrendako hainbat punturen aurka egindako aire-erasoetan eta lurreko operazioetan 30 palestinar inguru hil ostean iritsi da.

Horrela, gutxienez zortzi pertsona hil dituzte Rafah hiriaren aurkako bonbardaketa batean, Zerrendaren hegoaldean, eta beste sei Khan Yunisen aurkako aire-erasoetan, Israelgo Armada lurreko eta aireko operazioak egiten ari den eremu batean.

Bestalde, haur bat hil dute Jabaliako (iparraldea) errefuxiatu-eremuan, etxebizitza baten aurka izandako erasoan. Bederatzi gorpu berreskuratu dituzte (ama bat eta haren bost seme-alabak, besteak beste), WAFA albiste-agentzia palestinarrak jakitera eman duenez.

Gainera, Munir al Bursh Gazako Osasun Ministerioko zuzendari nagusia zauritu dute Jabalia hirian, bere etxebizitza baten kontra egindako bonbardaketan. Eraso horren ondorioz, agintariaren familiako 16 kide hil dituzte, alaba barne, Filastin egunkari palestinarrak azaldu duenez.

Bestalde, agintari palestinarrek Benjamin Netanyahu Israelgo lehen ministroari Palestinako Aginte Nazionala "deabrutzea" leporatu diote, "Zisjordaniaren anexioa errazteko" eta Gazako Zerrendatik "bereizteko", "bi estatuen konponbidea zapuzteko ahaleginean".

Azkenik, bahitu israeldarren senideen foroak gaur baieztatu du haietako baten heriotza, baina ezin izan dute haren gorpua berreskuratu. Hildakoa Gadi Haggai da, 73 urtekoa, eta haren emaztea gatibuen artean dago, Bahituen eta Desagertuen Familien Foroaren arabera.