Bernardo Arevalo aurrerakoiak lortu du garaipena Guatemalako hauteskundeetan

Bernardo Arevalo aurrerakoiak lortu du garaipena Guatemalako hauteskundeen bigarren itzulian. Semilla Mugimenduko hautagaiak botoen % 58 lortu ditu, 2,4 milioi boto-emaileren babesa jaso baitu. Bestalde, Sandra Torresek botoen % 37 lortu ditu, 1,5 milioi boto-emaileren babesa eskuratuta.

Hautagai aurrerakoiak ustelkeriaren, atzerakada demokratikoaren eta herrialdean nagusi zen klase politikoaren aurka zabaldutako mezua herritarrengana iritsi da, garaipena eman baitio, Sandra Torres lehen dama ohia bigarren postuan utzita.

Alejandro Giammattei Guatemalako presidente ohiak zoriondu egin du Arevalo, eta "trantsizio ordenatua" eskaini dio. Agintariak pozik agertu da istilu gutxiko hauteskunde baketsuak izan direlako.

Inbestidura urtarrilaren 14an

Gobernua osatzeko zailtasunak izan ditzake urtarrilaren 14an; izan ere, Fiskaltzak hainbat saiakera egin ditu Semilla Mugimendua desegiteko, 2018an alderdia sortu zenean ustez sinadura faltsuak aurkeztu zituztela zabaldu ostean.