10 atxilotu Txilen, suteekin zerikusia dutelakoan

Joan den ostiraletik Txileko erdialdean piztuta dauden sute izugarriek ez dute atsedenik ematen, eta dagoeneko 24 dira sute horietan hildako pertsonak.

Dozenaka foku aktibo kontrolatzeko borrokak jarraitzen duen bitartean, ikerketak aurrera egin du igandea honetan; izan ere, Txileko Gobernuak jakinarazi duenez, 10 pertsona atxilotu dituzte suteekin zerikusia dutelakoan. Gabriel Boric Txileko presidenteak Patagoniako oporrak bertan behera utzi ditu ostiral honetan, suteek kaltetutako eremuetara bidaiatzeko. Suteetako batzuk "baimen gabeko erretzeen" ondorioz gertatu zirela erakusten duten "zantzuak" daudela esan du.

Manuel Monsalve Barne idazkariordeak prentsaurrekoan ohartarazi duenez, legea oso gogorra da kasu horietan, eta bost urtetik hogei urtera bitarteko kartzela-zigorrak dakartza.

Azken orduetan, La Araucania eskualdeko Angol herrian ospitaleratuta zegoen gizon bat hil da zauri larrien ondorioz. Ondorioz, hildakoen kopurua 24ra igo da.

Monsalvek adierazi duenez, "26 pertsona daude ospitaleratuta" erredura larriekin, eta 100.000 hektarea baino gehiago suntsitu dituzte sugarrek. Maule, Ñuble, Biobio eta La Araucania eskualdeak dira kaltetuenak, nekazaritza- eta basogintza-jarduera handiko eremuak, Santiagotik 400, 500 eta 700 kilometro hegoaldera, hurrenez hurren. Sugarrek 800 etxebizitza inguru suntsitu dituzte, 3 Maulen, 207 Ñublen, 311 Biobion eta 279 La Araucania eskualdean, kalkuluen arabera.

Txileko Barne Ministerioaren Hondamendiak Prebenitzeko eta Erantzuteko Zerbitzu Nazionalaren (Senapred) azken txostenaren arabera, sugarrek 1.801 pertsona kaltetu eta 977 zauritu dituzte. 1.475 aterpe jarri dituzte kaltetutako herrietako biztanleei aterpea emateko. 150 foku kontrolpean daude dagoeneko, eta 50 inguru daude oraindik kontrolik gabe.

13 urte baino gehiago daramatza Txilek lehorte egoeran, eta ezohiko bero-bolada izaten ari da hegoaldean. Tenperatura 40 graduraino irits daitezke datozen orduetan hegoaldean, han inoiz ikusi gabeko zifrak dira.

Suteen mapa.

Nazioarteko laguntza

Besteak beste, Espainiak, Argentinak, Mexikok eta Kolonbiak erantzun diote dagoeneko Txileko Gobernuak larunbatean eskatutako nazioarteko laguntza deiari. Espainiako Gobernuak hegazkin bat bidali du Espainiako Indar Armatuen Larrialdietarako Unitate Militarrarekin (UME). Gainera, Camila Vallejo Txileko Gobernuko bozeramaileak prentsaurrekoan esan duenez, 300 brigadista mexikar eta 64 argentinar iristen ari dira, material teknikoaz gain.