Qatarreko eroskeriaren itzalak Europako politikaren oinarriak astindu ditu

Ursula Von der Leyen Europako Batzordeko presidenteak eskatu du Europako erakundeek "independentzia eta osotasun estandar altuak" bete ditzatela, Qatarrekin lotutako ustezko ustelkeria eskandaluaren ostean. Europako Parlamentuko presidenteorde Eva Kaili sozialdemokrata greziarrak bere banku-gordailuak bikoiztu zituen bi urtean, Greziako Parlamentuaren webgunean eskuragarri dauden ondasunen urteroko aitorpenen arabera.

"Konfiantzak independentzia eta osotasun estandar altuak behar ditu", esan du Von der Leyenek prentsaurrekoan, eta gogorarazi du Europako erakundeetan jardunbide egokiak betetzen direla zainduko duen organo bat sortzea proposatu duela Europako Batzordeak.

1:19

Belgikako Fiskaltzak hilabeteak zeramatzan Qatarreko mundialaren auzia ikertzen

Margaritis Schinas Europako Bizimodu Batzordeko presidenteordea Dohara joan zen Munduko Futbol Txapelketaren inauguraziora, baina Von der Leyenek ez du bisita hori aipatu nahi izan, eta "komisarioen bilera guztiak" gardentasun erregistroan argitaratuta daudela erantsi du.

Prentsaurrekoan adierazi duenez, Brusela "lanean" ari da Qatarrekin klima-aldaketaren aurkako borrokan, giza eskubideen defentsan eta gasa erosteko, Errusiarekiko menpekotasuna murrizteko. Agerraldia kazetari baten oihuekin amaitu da, Von der Leyen eskandaluari buruzko galdera guztiei erantzuten ari ez zelako kexuka.

Roberta Metsola Europako Parlamentuko presidenteak esan du Euroganberako prozesuak oztopatzen saiatu direnen egitasmoek "porrot" egin dutela, eta gardentasuna hobetzeko eta eskandalua ikertzeko neurri sorta iragarri du.

"Demokraziaren etsaiak, zeinentzat parlamentu honen existentzia mehatxu bat den, ez dira ezeren aurrean geldituko. Bere asmo maltzurrek porrot egin dute. Gure zerbitzuek Belgikako agintariekin lan egin dute ustezko sare kriminal hori desegiteko ", azpimarratu du Metsolak osoko bilkuraren hasieran, Estrasburgon.

Bestalde, Annalena Baerbock Alemaniako Atzerri ministroak esan du EBren "sinesgarritasuna" jokoan dagoela. Alemaniako diplomazia buruak ez du baztertu "hainbat arlotan ondorioak" izatea, "inoiz ez baitugu horrelako kasurik bizi izan", baina Justiziak gertatutakoa lehenago argitzeko eskatu du.

Italiako Justizia ministro Carlo Nordiok adierazi du eskandalu hori "kezkagarria" dela, eta ikerketaren amaierara arte itxarotea eskatu duen arren, "okerrena" dena Europako Parlamentua bezalako erakunde batean gertatzea dela onartu du.

Roberta Metsola Europako Parlamentuko presidentea. Argazkia: EFE

Azkenik, Gardentasun Internazionala gobernuz kanpoko erakundeak Europar Batasuneko erakundeen etika eta osotasun sistemen erabateko erreforma premiaz egitea eskatu du, eskandaluaren ondorioz.

"Ikuskapen etiko independentea behar da, argi eta garbi funtzionatzen ez duen autoerregulazio-sistema bat amaitzeko", azaldu du erakundeak ohar batean, eta "eroskeria eta ustelkeria eskandalu ikaragarritzat" jo du joan den ostiralean Belgikako agintariek jakinarazitakoa.