Nazioarteko hainbat webgunek jaso dituzte Irulegiko aurkikuntzaren nondik norakoak

Baskoien hizkuntzan idatzitako testu zaharrena ("Sorioneku") Irulegin (Nafarroa) topatu dutela jakinarazi zuen atzo Aranzadi Zientzia Elkarteak, eta ordutik, Irulegiko eskuaren ingurukoak nonahi irakur daitezke Euskal Herrian, hedabide zein sare sozialetan, baina baita Espainiako zein Frantziako estatuetako hainbat ataritan ere. Hori bakarrik ez, gure mugak zeharkatu, eta besteak beste, Arabiar Emirerri Batuetara eta Brasilera heldu da albistea.

"Urrutiko intxaurrak 15, gerturatu eta bost" dio esaerak, baina kasu honetan, kontrakoa iruditu zaie Sharjah 24 Arabiar Emirerri Batuetako atariko arduradunei. Hala, Aranzadik zabaldutako irudiez hornitutako albistea eskegi dute euren webgunean. "Euskaraz idatzitako testurik zaharrena aurkitu dute Espainian" diote, hitzez hitz, ingelesez idatzitako lerroburuan ("Oldest known text in ancient Basque discovered in Spain"). Are gehiago, euren Twitterren kontuan ere partekatu dute albistea:

Oldest known text in ancient #Basque discovered in #Spain https://t.co/3zVdWYBFhK#Sharjah24 pic.twitter.com/8ZRWcFQHYz

— ¿¿¿¿¿¿¿24 (@sharjah24) November 15, 2022

Hego Ameriketara ere, Brasilera zehazki, iritsi da baskoien arrabotsa. "Correio Braziliense" Brasilian egoitza duen egunkariak luzeago jorratu ditu aurkikuntzaren nondik norakoak, Irulegiko eskuaren argazki eta guzti. Portugaleraz idatzitako testua da, eta "euskaraz" idatzitako testurik zaharrena Nafarroan aurkitu dutela "baieztatutzat" ematen dute.

Horrek ere bere sareetan zabaldu du albistea:

O objeto do século I a.C, abriga o texto em língua basca mais antigo já conhecido.https://t.co/W8o8Y8ShJm

— Correio Braziliense (@correio) November 14, 2022

Egunkari hori, gainera, ez da albistea hizkuntza horretan jaso duen bakarra. CNN Portugal atariak zehaztapen handiko artikulua idatzi du, eta Irulegiko eskuaren argazkiaz gain, Maria Chivite Nafarroako presidentearen txioa erantsi dio informazioari. "Antzineko euskaraz" idatzitako testu zaharrena "Espainia iparraldean" aurkitu dutela zehaztu dute titularrean.

Twitterren partekatutako txioan gehiago mugatu du aurkikuntzaren kokapena, esanez "Irulegui"ko gazteluaren hondakinen artean topatu dutela eskua, Iruñea hego-ekialdean: 

Mão em bronze do século I antes de Cristo (a.C.) foi encontrada em junho de 2021 sob as ruínas de um castelo em Irulegui, a sudeste de Pamplona https://t.co/U8KuM1mjRz

— CNN Portugal (@cnnportugal) November 15, 2022

Time.news mundu zabaleko albisteak jasotzen dituen webguneak ere lekua egin dio Nafarroan egindako aurkikuntzari, ingelesez. Bideoz, hainbat argazkiz eta Aranzadi zein Nafarroako Gobernuko ordezkariek egindako adierazpenak bildu dituzte artikulu mamitsu batean.