Gazpromek hiru egunerako eten du Alemaniarako gas hornidura, Nord Stream 1eko "mantentze-lanengatik"

Gazprom gas konpainia errusiarrak Nord Stream 1 gasbidearen bidez Alemaniari hornitutako gas fluxua eten du asteazken honetan hiru egunerako "mantentze lanengatik". 

Moskun 04:00ak zirenean (03:00ak Euskal Herrian) eten dute gasbidearen bitartez heltzen den gas hornidura. Etenaldi hori irailaren 3ra arte luzatuko da, Errusiako TASS agentziak jakinarazi duenez.

Gazpromek adierazi du etenaldia beharrezkoa dela Alemaniako Greifswaldeko harrera gunean prebentziozko mantentze-lanak egiteko.

Konpainia errusiarrak abuztuaren 19an azaldu zuenez, martxan dagoen punpatze estazio bakarra gelditu egin beharko da aldian-aldian, eta behin lanak amaituta, egunean 33 milioi metro kubiko gas hornitzera pasako da. 

Kopuru hori gasbideak duen gaitasun efektiboaren % 20 litzateke, Bloomberg agentziaren arabera, egunean 167 milioi metro kubiko igortzeko ahalmena baitu. 

Alemaniak gasbide horretan jarriak ditu itxaropenak barne beharrak asetzeko, Nord Stream 2 gasbide alternatiboa zabaltzeko aukera albo batera utzi ondoren, bai Ukrainiaren inbasioagatik, bai alderdien artean dituzten desadostasunengatik. 

Atzo Engie energia hornidurako konpainia frantziarrak jakinarazi zuenez, Gazprom errusiar erraldoiak gas fluxuaren hornidura murriztu du astearte honetatik aurrera.