OME: "Birusa bizkortzen ari da eta fase berri eta arriskutsu batean dago"

Tedros Adhanom Ghebreyesus Osasunaren Mundu Erakundeko (OME) zuzendari nagusiak ohartarazi duenez, COVID-19aren pandemia "bizkortzen" ari da, izan ere, atzo jakinarazi zituzten kasu berri gehienak, 150.000 baino gehiago. Kasu horien ia erdia Amerikako kontinentean zenbatu zituzten, eta kopuru handiak jaso zituzten Asiako hegoaldean eta Ekialde Ertainean ere.

"Mundua fase arriskutsu eta berri batean dago. Jende asko nazkatuta dago etxean egoteaz. Ulergarria da herrialdeak beren gizarte eta ekonomiak irekitzeko irrikan egotea. Baina birusa azkar hedatzen da, hilgarria izaten jarraitzen du, eta jende gehienak sentibera izaten jarraitzen du. Herrialde eta pertsona guztiei muturreko zaintza egiteko deia egiten diegu", ohartarazi du prentsaurrekoan.

Tedrosek segurtasun tartea mantentzea eskatu du. "Gera zaitezte etxean gaixorik bazaudete. Jarraitu sudurra eta ahoa estaltzen eztulka hasten zarenean. Erabili maskara bat egokia denean. Segi eskuak garbitzen. Oinarrizkoan zentratzeko eskatzen diegu herrialde guztiei: kasu bakoitza aurkitu, isolatu, probatu eta zaindu. Arakatu eta jarri berrogeialdian kontaktu bakoitza", gaineratu du.

Pandemia bizkortu ahala, "ahulenak gehien sufritzen dutenak" izango direla zehaztu du nazioarteko osasun erakundeko zuzendariak. "Herrialde aberats eta pobre guztiek gaixotasun larriak izateko eta hiltzeko arrisku handiagoa duten herriak dituzte", gogorarazi du larunbat honetan ospatuko den Errefuxiatuen Mundu Egunaren harira.