Trumpek berretsi du ez duela konfinamendu agindurik emango herrialde osoan

Donald Trump AEBko presidenteak berretsi du ez duela herrialde osoaren konfinamendua aginduko koronabirusagatik, estatuen artean pandemiak eragin maila "desberdina" duelako.

"Estatu batzuk desberdinak dira. Estatu batzuek ez dute arazo handirik", adierazi du Trumpek Etxe Zurian koronabirusari buruzko lantaldearekin bildu osteko prentsaurrekoan.

Trumpek esan du "ulertzen" duela Ron DeSantis Floridako gobernadoreak herritarrei etxean geratzeko agindua eman izana, baina gaineratu du "malgutasuna" behar dela estatuen artean, kasu bakoitzaren arabera jokatu behar dela.

"Malgutasun pixka bat eman beharra dago. Alaskan, adibidez, ez dago arazorik, beraz, oso zaila da ixtea", berretsi du.

Trumpek esan du "larria" dela gaixotasuna, eta horregatik aldatu duela tonua, dagoeneko ez duelako koronabirusa ohiko gripearekin konparatzen, pandemiaren lehenengo egunetan egiten zuen moduan.

"Oso kutsakorra dela uste dut. Inork ez du horrelakorik ikusi, pertsona talde handi batek, bat-batean, gaitza duen norbaitekin egote hutsarekin, harrapatu egiten du", adierazi du, osasun alorreko profesionalak "heroi, gerlari, soldadu" gisa txalotu aurretik.

Baina agintaria estatubatuarrak ez du konfinamendu agindurik emateko asmorik COVID-19ari aurre egiteko, nahiz eta kasu gehien dituen herrialdea izan (213.000 baino gehiago).

Hala ere, estatu batzuetan (Florida, Maine eta Arizona) tokian tokiko agintariek etxean geratzera behartu dituzte herritarrak koronabirusaren zabalkundea gelditzeko.

Aireko garraioa

Bestalde, agintari estatubatuarrak aitortu du egoera okerrenean dauden estatuetan aireko garraioa bertan behera uztea ari direla aztertzen, eta ohartarazi du oso mugimendu "gogorra" izan daitekeela.

"Hori egitekotan gaude, baina horri ekitea oso zaila da", adierazi du, eta azpimarratu hegaldi asko kaltetutako estatuen artean egiten direla.

Trumpek iradoki du beste bi ospitale-itsasontzi erraldoi eraikitzekotan direla osasun sektoreari laguntzeko. New Yorken dago orain arteko bakarra, eta 1.000 ohe ditu.