530.000 pertsona kutsatu eta 24.000 hil dira munduan koronabirusaren ondorioz

Koronabirusaren pandemiak 530.000 pertsona kutsatu eta 24.000 hil ditu dagoeneko mundu osoan, eta AEBn 18.100 kasu atzeman dituzte egun bakarrean, egun batean inon atzemandakoak baino gehiago. Txinan ere ez zuten otsailean, gaixotasuna bere faserik okerrenean zenean, horrelako datu txarrik bildu.

Johns Hopkins Unibertsitateak gaur, ostiralarekin, 08:00etan eguneratutako balantzearen arabera, koronabirusaren pandemia 176 herrialde eta lurraldetara iritsi da, 533.416 pertsona kutsatu ditu eta 24.082 hil. COVID-19a, koronabirusak eragiten duen gaixotasuna, izan duten 122.710 pertsona sendatu dira, gehienak (74.180), Txinan.

Pandemiak gogorren jo dituen lau herrialdeetan (AEB, Txina, Italia eta Espainia), 306.000 kasu zenbatu dituzte, mundu osoan kutsatuta dauden pertsona guztien erdiak baino gehiago.

Ostegunetik, AEB da munduan positibo gehien atzeman dituen herrialdea: 85.991 pertsona kutsatu eta 1.296 hil dira.

Txina dago bigarren, 81.782 positibo eta 3.291 hildako baitaude. Italian, bestalde, kutsatuen kopuruak gora egiten jarraitzen du. Kasu gehien dituen herrialdeetan hirugarrena da (80.589 positibo), eta heriotza gehien zenbatu dituena: 8.215.

Laugarren Espainia dago. 57.786 positibo, 4.365 hildako eta osatutako 7.015 pertsona zenbatu dituzte bertan, ostiral honetan 08:30ean eguneratutako datuek erakusten dutenez.

Alemania da birusak gogorren jotako herrialdeetan bosgarrena, eta Frantzia seigarrena, Iran (zazpigarren dago orain) gaindituta.

Horien atzetik daude Erresuma Batua, Suitza, Hego Korea, Herbehereak, Austria, Belgika eta Kanada.

Turkia, Portugal, Norvegia, Australia eta Israel aldean 3.000 kutsatuen maila gainditu dute; Suedian, Malaysian eta Danimarkan, 2.000koa, eta mila positibotik gora zenbatu dituzte Txekiar Errepublikan, Irlandan, Luxenburgon, Ekuadorren, Japonian, Txilen, Pakistanen, Polonian, Thailandian, Errumanian eta Saudi Arabian.