Italiak apirilaren 3tik harago luzatuko du indarrean dagoen konfinamendu agindua

Guiseppe Conte Italiako lehen ministroak ostegun honetan iragarri duenez, apirilaren 3an amaitzekoa zen konfinamendu agindua luzatuko du Italiako Gobernuak, COVID-19 gaitzak eragindako pandemiari aurre egiteko. Izan ere, bere esanetan, orain arte hartutako neurriak eraginkorrak izaten ari dira, baina ezinbestekoa da epea luzatzea koronabirusa garaitu ahal izateko.

"Une honetan ez da komeni gehiago esatea, baina argi dago orain arte hartu ditugun neurriak luzatu egin beharko direla", esan du Italiako gobernuburuak, Il Corriere della Sera egunkariak egindako elkarrizketan. Ildo horretatik, denda eta ikastetxeen ezarritako itxiera onuragarria izaten ari dela ziurtatu du, besteak beste "sistemaren kolapsoa" saihestu duelako.

Testuinguru horretan, koronabirusa hedatzea saihesteko Italiako Gobernuak hartu dituen neurrien eraginkortasuna nabarmendu du Contek. "Neurri murriztaileak eraginkorrak izaten ari dira, eta argi dago koronabirus izurritearen gailurra gainditzen dugunean kutsatzeak gutxitzen hasiko direla, ehunekotan behintzat. Arrazoi horregatik, datozen egunetan oraindik ezin izango gara lehengo bizimodura itzuli", esan du Italiako lehen ministroak.

Halaber, koronabirusari aurre egiteko "sen ona" erabili behar dela azpimarratu du, eta "kontzientziaz" jokatzeko eskatu die herritarrei, Italian konfinamendu agindua eta beste neurri murriztaile batzuk indarrean dauden une honetan, kutsatutako eta koronabirusaren eraginez hildako pertsonen kopuruak gora egin ez dezan.

"Arauak hausten dituztenentzat zigor penalak indarrean daude, eta zorroztasun handiz ezarriko dira. Alkateek hartutako neurriekin bat doaz, herriak eta parkeak itxi baitituzte. Gauza bat da kirola egitea, eta beste bat leku publikoak bilgune bihurtzea, eta hori onartezina da", adierazi du Contek. Dena dela, une honetan Italiako Gobernuak ez duela beste neurri murriztailerik ezartzea aurreikusten argi utzi du.

Ostegun honetara arte, Txinako Wuhan hirian lehen aldiz agertutako COVID-19 gaitzaren eraginez 2.900 pertsona hil eta 37.000 kutsatu dira Italian, tokiko agintariek jakinarazi dutenez. Nazioartean, berriz, 8.000 hildako eta 200.000 kutsatu baino gehiago utzi ditu koronabirus berriak.