Moralesek bigarren buelta saihesteko garaipena lortu du

Evo Morales Boliviako egungo presidenteak hauteskundeen bigarren itzulia saihesteko beharrezko botoak eskuratu ditu, eta joan den igandean egindako hauteskundeetako irabazlea bihurtu da, Hauteskunde Auzitegi Gorenak zabaldutako azken zenbaketaren arabera, botoen % 99,99 zenbatuta.

Botoen % 47,07 eskuratuta, Morales 10,56 puntura kokatu da Carlos Mesa oposiziogilearen aldean, botoen % 36,51 eskuratu baititu. Botoen % 0,01 baino ez dira falta zenbatzeko eta, beraz, egoera atzeraezina da.

Saludamos y agradecemos a nuestro pueblo y a los sectores sociales por este nuevo triunfo del MAS-IPSP. Es la cuarta elección consecutiva que ganamos democráticamente. Nos impusimos con más de medio millón de votos al segundo y tenemos mayoría absoluta en diputados y senadores. pic.twitter.com/mCtLriMse4

— Evo Morales Ayma (@evoespueblo) October 23, 2019

Herrialdeko hainbat hiritan lau eguneko protestak eta bi eguneko lanuzte mugagabea egin ostean, Mesaren zein Moralesen jarraitzaileek kaleetan aurre egiten jarraitzea espero da, hauteskundeen ondoren bizi den ziurgabetasun politikoaren ondorioz.

Oposizioak hauteskundeen "iruzurra" salatu du, eta protestek bigarren itzulia egin arte jarraituko dutela berretsi du. Hautagai batek ere ez bazuen beharrezko abantaila lortzen bigarren buelta hori abendurako aurreikusita zegoen.

Alarmak piztu ziren hauteskunde gauean, aurretiazko hauteskunde-emaitzak transmititzeko sistema 23 orduz eten zenean. Sistemari berriro ekin ziotenean, aldaketa eman zen ofizialismoaren alde, eta askok "ezin azalduzkotzat" jotzen dute aldaketa hori.

Oraingoz, zortzi dira zaurituak istiluen ondorioz. Herrialdeko bederatzi departamendutik zortzitan suteak izan dira Hauteskunde Auzitegien egoitzetan edo haien inguruetan. Poliziak, berriz, mobilizazioei "eusteko" agindua jaso du.