Oposizioaren protesta bat galarazi dute Caracasen negarra eragiteko gasarekin

Juan Guaido bere burua Venezuelako presidente izendatu duenak deitutako protesta negarra eragiteko gasarekin desegin du bertako Poliziak.

Guaidoren taldeak salatu du opositoreei ez dietela eszenatokia jartzen utzi, eta hiru pertsona atxilotu dituztela hori egin nahian ari zirenean.

Guaidok Twitterrez erantzun du Nicolas Maduroren Gobernuak "ezustekoa" hartuko duela, oposizioaren jarraitzaileek kalean jarraituko dutelako.

Creen que van a meternos miedo hoy, pero se van a llevar una sorpresa de Pueblo y de calle.

Pretenden jugar al desgaste, pero ya no tienen manera de contener a un Pueblo que está decidido a concretar el cese de la usurpación.

Y hoy lo vamos a demostrar en las calles. Atentos.

— Juan Guaidó (@jguaido) 9 de marzo de 2019

"Higatzen saiatzen ari dira, baina dagoeneko ezin diote eutsi agintea lapurtu duena kentzeko erabakia hartu duen herriari. Eta gaur horixe erakutsiko dugu kalean. Adi egon”, gaineratu du Twitterren xehetasun gehiago eman gabe.

Manifestazioak herrialde osoan deitu dituzte, Madurori kargua utz dezan presioa egiteko neurri gisa. Gainera, hainbat ordutako argindar itzalaldi orokor baten ostean dator protesta.

Venezuelan tentsio politikoa gorengo mailan dago aurreko urtarriletik, Guaidok bere burua herrialdeko presidente izendatu zuenetik.