Ipar Korearekin merkataritza murrizteko zigor gehiago iragarri ditu Trumpek

Ipar Korearen aurka aldebakarreko zigor berriak iragarri ditu gaur Donald Trump Ameriketako Estatu Batuetako presidenteak. Misil balistikoen programaren diru-iturria agortu nahi du neurri horiekin, Asiako herrialdearen merkataritza gehiago murriztuz.

“Ipar Korearekin merkataritza errazten eta finantzatzen duten erakundeak, konpainiak eta pertsonak jazartzeko agindu berri bat iragarri nahi dut”, esan du Trumpek, Moon Jae-in Hego Koreako presidentearekin eta Shinzo Abe Japoniako lehen ministroarekin izandako hitzorduan.

“Atzerriko bankuek mehatxu argia izango dute: Ameriketako Estatu Batuekin negozioak egin edo legerik gabeko Ipar Koreako erregimenaren merkataritza erraztu”, erantsi du Trumpek.

“NBEko zigorrak aplikatzeko eta neurri propioak ere inposatzeko dei egin nahi diegu nazio arduratsu guztiei”, esan du AEBko buruzagiak. “Ipar Korea desnuklearizatzea nahi dugu”, gaineratu du.

Ipar Korearekin oraindik elkarrizketarik egin daitekeen galdetu dio kazetari batek Trumpi, eta honakoa erantzun dio AEBko gobernuburuak: “Zergatik ez?”.