Zertan datza larrialdi egoera Frantzian?

Larrialdi egoera Aljeriako Gerran (1954-1962) arautu zuen Frantziak, 1956an onartutako lege batekin.

Gehienez, 12 egunez ezarri daiteke, eta, luzatu nahi izanez gero, Parlamentuak onartu behar du.

Azkenekoz, 2005ean ezarri zuen Gobernuak, hainbat auzo periferikotan istiluak jazo zirenean. Orduan ez bezala, baina, orain herrialde osoan ezarri dute.

Larrialdi egoerak hainbat botere berezi ematen dizkio Gobernuari, hala nola pertsonen eta ibilgailuen zirkulazioa galaraztea, miaketak eta atxiloketak epaileen baimenik gabe egitea eta hedabideak "kontrolatzea".

Halaber, Exekutiboak festa edo bilera aretoak itxi, eta "desordenak" eragin ditzaketen bilerak galaraz ditzake.

Hain zuzen ere, "ordena publikoari egindako kalte larrien ondorioz berehalako arriskua" dagoenean edota "hondamen publikoa" ekar lezaketen gertaerak daudenean ezarri daiteke larrialdi egoera.