Greziaren egoera, aztergai Eurotaldean

Greziaren eta nazioarteko hartzekodunen arteko negoziazioen egoera aztergai izango du gaur Eurotaldeak. Zortzi aste falta dira erreskatea amaitzeko, eta Atenasek likidezia arazoak ditu, baina oraindik ez dute akordiorik lortu.

Hori horrela, Grezia, Europako Batzordea, Europako Banku Zentrala (EBZ) eta Nazioarteko Diru Funtsa (NDF) negoziatzen ari dira egunotan. "Akordioa ekainaren hasieran heldu beharko litzateke, gehienez", Euroguneko goi-kargudun batek adierazi duenez.

Negoziazioak antolatu eta bideratzeko prozesuan aurrerapausoak eman dituzte, baina oraingoz ez dute akordiorik lortu. "Urrun gaude", aitortu dute Europako Batzordetik.

Horrenbestez, gaurko bileran ez dute erabaki irmorik hartuko. Euroguneko Ekonomia eta Finantza ministroek, baina, adierazpen bateratu bat sinatuko dute seguruenik, aurrerapausoak txalotu eta hartzekodunei eta Greziari lan egiten jarraitzea eskatzeko.

Alexis Tsipras lehen ministroaren Gobernuak aurrekoak kaleratu zituen 3.900 funtzionario kontratatu ditu berriz, eta hartzekodunak haserre agertu dira, Greziaren aldebakarreko erabakia izan baita.