Nepalen galduta dauden espainiarrak bilatzeari utzi diote

Jose Manuel Garcia-Margallo Espainiako Atzerri ministroak adierazi duenez, ez dago inolako itxaropenik apirilaren 25eko Nepalgo lurrikaraz geroztik falta diren sei espainiarrak aurkitzeko. Hori dela eta, amaitutzat eman dituzte horiek topatzeko bilaketa lanak.

"Dagoeneko ez dago horiek bizirik topatzeko itxaropenik", azaldu du Garcia-Margallok Atzerri Ministerioan eskainitako prentsaurrekoan.

Halaber, esan du lanean jarraituko dutela gorpuak Espainiara eramateko eta iragarri du gaur egingo duela atzera Armadako Boeing 707 hegazkinak.

Hala ere, Garcia-Margallok iragarri du auzitegi medikuek Nepalen jarraituko dutela lurrikaran hil diren pertsonak identifikatzen laguntzeko, horien artean espainiarren bat egon litekeelako.

Ildo horretan, gaineratu du Espainiako Polizia Zientifikoko kideak ere bertan geldituko direla falta diren espainiarrak identifikatzeko "itxaropena" dagoen bitartean.

Guztira, 557 espainiarrei eragin die lurrikarak eta horietatik 549 aurkitu dituzte, 6 falta dira, 1 hilda topatu dute eta beste pertsona bat lurrikararen ondorengo istripu batean hil zen.