'Euskal Bidea' jorratzeko 'jardunaldi irekia' iragarri du EH Bilduk

'Euskal Bidea' proposamenean aurrera egiteko xedez, martxoaren 7an 'jardunaldi irekia' egingo dutela iragarri du igande honetan Oskar Matute EH Bilduko legebiltzarkideak. "Euskal Herri osotik hartutako milaka kaferen ondoren jasotako ekarpen eta konpromiso guztien isla izatea" da asmoa.

Hori horrela, egun horretan 'Euskal Bidea' jorratzeko egindako lehen 10.000 urratsak aurkeztuko ditu koalizioak, eta orduan benetako protagonista "euskal gizartea" izango dela iragarri du Matutek.

Legebiltzarkideak azpimarratu duenez, "Euskal Bidea ekimenak demokrazia ekarriko duen bidea eraiki nahi du, eta eztabaidatzeko eta erabakiak hartzeko lana herritarren esku utzi".

Gainera, "subiranotasunerantz aurrera egin ez ezik, Euskal Herri justuagoa eraiki nahi dugu, mafia ekonomiko eta politikorik gabekoa, Euskal Herri sozialagoa behar dugulako, hemen bizi garen guztiok duintasunez bizitzeko aukera izan dezagun".

Matuteren hitzetan, "Euskal Bidea proposamenak haren etorkizunaren jabe den herri bat altxatu nahi du, esparru guztien inguruan erabakitzeko eskubidea izango duena".

Kutxabank

Bestalde, 'Kutxabank auzia' aipatu du Matutek, EAJk, PSEk eta PPk "borroka egoera" abiatu dutela salatzeko, "konplizeak eta erantzuleak diren bitartean". Horren iritzian, Mikel Cabieces sozialistari Mario Fernandez Kutxabankeko presidente ohiak egindako ordainketak "hark bere kabuz egindakoak dira".

Azkenik, EH Bilduko kideak aurreratu duenez, ikerketa-batzordea eskatuko dute Eusko Legebiltzarrean Kutxabanken inguruan izandako ustezko irregulartasunak argitu ditzan.