Munduko Osasun Erakundeak txertatze masiboa egingo du ebolaren aurka

Munduko Osasun Erakundeak ebolaren aurkako txertatze kanpaina masiboa hasiko du Afrika mendebaldean, Liberian, Sierra Leonan eta Ginean, hain zuzen ere. Herrialde horietan 8.000 lagunetik gora hil dira ebolaren ondorioz.

Saio kliniko horien 3. fasean 37.000 bat lagunek hartuko dute parte (orain 1. fasean ari dira). Txertoak VSV-ZEBOV dira, Kanadan garatutakoak, eta patentea Merck eta ChAd-EBO enpresen esku dago.

"Saioen hirugarren fase horrek onik dauden boluntarioei txertoa jartzea ekarriko du, birusa transmititzen den eremu batean, Afrikako mendebaldean, alegia", azaldu du prentsaurreko batean Marie-Paule Kieny Munduko Osasun Erakundearen zuzendariak.

Txertoaren aurkikuntza aurreratzeko, bigarren eta hirugarren faseak aldi berean egingo dituzte, aditu horrek baieztatu duenez. Bigarren fase horretan parte-hartzaile kopuru handiagoa izango da, eta ez bakarrik Afrikan, baita AEBn, Alemanian, Erresuma Batuan eta Suitzan ere. Halaber, hainbat talde berezi hartuko dituzte, tartean, umeak.