Errusiazaleek Lugansken 24 ordutan 100 pertsona hil direla esan dute

Ehun pertsona inguru hil dira, militarrak nahiz zibilak, azken 24 orduetan Lugansk eskualdeko Schastie herrian izandako borroketan, errusiazaleek jakinarazi dutenez.

Schastie eskualdeko hiriburuaren kanpoaldean dago, eta Ukrainako Guardia Nazionalak matxinatuen eskuetatik askatu zuen atzo, Luganskera bidean. Milioi erdi biztanle dituen Lugansk hiria da errusiazaleen gotorleku nagusia.

Eskualdeko zonalde zabal batean, hiriburua barne, bi aldeen arteko borroka gogorrak bizi dira azken asteetan.

Hildako bat eta hainbat zauritu Slaviansken

Gutxienez pertsona bat hil da eta beste hainbat zauritu dira gauean, ekialdeko Slaviansk hirian Ukrainako armadak egindako bonbardaketa batean, Itar-Tass informazio agentzia errusiarrak milizia separatisten eskutik jakin izan duenez.

Obusek gehien kaltetu dituzten zonaldeak Semionovka eta Cherevkovka izan dira. Gainera, Slaviansk osoan argindarrik eta urik gabe jarraitzen dute.